Qaammatip suliffeqarfia: VR Travel

VR Travel – Vejle Rejseritut aamma ilisimaneqartoq – ukiut 50-it sinnerlugit Kalaallit Nunaanni nunarsuullu sinneraniittut sunngiffimminni sulinerminnulluunniit angalasut ikiorsimavaat. 1969-imiilli aallartissimapput, Nuummilu 1994-imiilli allaffeqarlutik, maannakkullu suliffeqarfik Kalaallit Nunaanni angalanissamut suleqatissatut misilittagaqarnerpaat ilaanniippoq - aammalu Kalaallit Nunaanni inuussutissarsiutillit nunanut tamalaanut tikissinnaassusaannut pingaarutilittut inissisimallutik, taama oqarpoq Nungo Pedersen, VR Travel Greenland bureauchefi.

Suliffeqarfik ataatap ernerullu, Gunnar aamma Peer Bjørckikkut, pilersissisimavaat, Harzenimit takornarissanik angallassinissaq siunniussimallugu - pitsianngitsorli qallunaat kalaallillu timmisartukkut angallannissaannut migisassarsiornissaannullu suliaqalersimapput. Kalaallit Nunaanni suliffeqarfiit sullinneqaleraluttuinnarnerini Nuummi allaffittaarsimapput, taamaalillutik ullumikkut atuisut angallannermut siunnersortinik oqaatsiminnik paaseqatigisinnaasaminnik angallannermullu ilisimasalinnik sullinneqarsinnaalerput.

Nungottaaq oqaatigaa VR Travelip angallassisunut allanut assigiinngissutaa tassaasoq pilersuisunut attuumassuteqannginnera piginnittunullu. Tamanna peqqutaalluni eqaannerusumik periuseqarput aammalu aalajangiipallassinnaallutik - tamannalu isumaqarpoq atuisut pisariaqartitaat malillugit suliffeqarfik imaaliallaannaq iliuuseqarsinnaasoq, nalimmassaasinnaasoq naaperiaasinnaasorlu. Angallannerit ataasiakkaajugaluarpata imaluunniit sulinermut atatillugu pisariusunerusumik angalasuugaluarpata VR Travelimi ataatsimik siunertaqarluta sullissisarpugut: atuisumut pitsaanerpaamik aaqqiissummik qulakkeerinnissaagut.

Suliffeqarfiup pingaaruteqarfiata ilagaa nunatsinni nunarsuarmilu pissutsinut tunngassuteqartut. Danmarkimi Kalaallit Nunaannilu allaffiit ulloq unnuarlu atuisunut kiffartuussiveqarneri peqqutaallutik VR Travelimi angalasut sumiissusersineqarsinnaapput ikiorneqarsinnaallutillu - aamma pinartoqartillugu. Suliffeqarfittaaq siunertalimmik CTM-mut (Corporate Travel Management) suleqatiginnippoq, tamannalu peqqutaalluni timmisartuussinernut, akunnittarfinniinnernut biilininnut attartornermut akit unammillersinnaasut pissarsiarineqarsinnaallutik.

Piujuartitsinermut attuumassusillit aamma isiginiarneqarput. Suliffeqarfiup iluani VR Travelimit innaallagissamut pappialanullu atorneqartut annikillisarniarneqarput, saniatigullu inuussutissarsiutilinnut angallannernit CO₂-mut nalunaarusianik kisitsisinillu neqerooruteqarsinnaalluta. Teknologi eqqarsaatigalugu systemitta sumiiffimmi suleqatigisatsinnut atassuteqarsinnaanissaat sulissutigaarput, taamaalilluta Kalaallit Nunaanni nioqqutissat neqeroorutigineqarsinnaasut ataatsimoortippagut, tikikkuminarnerulertippagut ersarinnerulersillutigillu.

Nuummi, Ilulissani Qaqortumilu nunat tamalaat tikiffigisinnaasaannik mittarfittaarnissaq eqqarsaatigalugu angallanneq allanngoriartulerpoq. Angallavissat nutaat, tikitassat nutaat assigiinngisitaarnerusullu periarfissaalerput. Nungop naatsorsuutigaa sulinermut atatillugu angalasut suli eqaannerusumik toqqagassaqarnerusumillu - soorlu nassatanut loungenullu tunngasut eqqarsaatigalugit - angalarusussasut soorlu aamma timmisartuussinerni takinerusuni innangalluni sinissinnaanissaq eqqarsaatigalugu.

Siunissaq eqqarsaatigalugu VR Travelimi Kalaallit Nunaannit nunallu tamalaat akornanniit angalasut attatiinnarneqarnissaannut annertunerulersinneqarnissaannullu siunertalimmik sulivugut. Uagut inissisimaffitsinni pituttorsimasuunngilagut, nunatsinnut naleqqussarsimavugut nunarsuullu sinneranut attaveqarluta, taamaalilluta angallassisuuvugut suliffeqarfinnit toqqarusunnarnerusut, pissutsinut, kiffartuussissutsinut tutsuiginassutsimullu isiginninniartuusut, taama Nungo naggasiivoq.