Nuummiippoq suliffeqarfik ukiuni qulikkaani kingullerni viinninik, imigassanik allanillu immikkuullarissunik Kalaallit Nunaanni tuniniaanissaminut pitsaasumik tunngaveqalernissaminut ineriartorsimasoq. Vinslottet pisariaqartitsineq tunngavigalugu aallartinneqarsimavoq – massakkullu suliffeqarfittut ingerlanneqarsimalluni. Piginnittut turistinut high-end-imik taaneqartartunik amerikamiut siulersuisuinut tuniniaaniarlutik aallartipput. Tunisassiani ilaatigut kangerlummi puisinniartitsisoqartarpoq, illuaqqani ilorrisimaarnartuni unnuisoqartarpoq, tuttunniartoqartarpoq sermersuarmullu angallassisoqartarluni. Misigisassat nuannernerulersinniarlugit viinnit whiskeysillu mamartut unnukkut sassaalliutigineqarsinnaatinniarneqarsimapput, pitsaassuserli piumaneqartut Nuummi piffissami tassani pissarsiassaasimanngilaq. Taamaattumik tassani aalajangersimapput nioqqutissanik tikisitsisalerniarlutik, tassanilu Vinslottet aallartippoq – viinninut, imigassanut nerisassanullu mamartunut pisiniarfik immikkuullarissoq.
Aallartinnerminni sapiillisaarlutik pisiassaatitik viinninik ooqattaatitsinikkut saqqummiuppaat Ukiumilu siullermi akeqanngitsumik ooqattaasinnaanermut aaqqissuussat arlaqarsimapput, perianngitsorlu illoqarfimmi nuannarineqalersimallutik. Tamatumalu kingunerisimavaa aningaasaliinerusariaqarneq, tamannalu aningaasaatinut malunnarsimavoq, tamannali aamma atuisussat ilisimanissaannut tunngaviliivoq, taannalu suliffeqarfiup ineriartorfigisimavaa, 2019-imi Vinslottet pisiniarfimmik nutaamik ilaqqinneqarpoq, Vinslottet Downtown, taannalu pisisartunut inuusunnerusunut orniginarneruvoq, taamaalilluni aamma pisisartut nutaat pissarsiarineqarsinnaalerput.
Ullumikkut Vinslottet Kalaallit Nunaanni pisiniarfiuvoq immikkuullarissoq assigiinngitsunik amerlanerpaanik tuniniaasuusoq. Viinnit nunarsuarmi assigiinngitsuneersut aammalu whiskeyit, romit, ginit, vodkat, cognacit portvinilu assigiinngitsut periarfissaapput. Taakkua saniatigut immikkuullarissut allat soorlu flødeborlut, chokoladit pitsaasut tupatallillu aamma tunisassiaapput. Pisiassat atuisut soqutigisaat aallaavigalugit inississugaapput, tassanilu mamassutsit kalaallit soqutigisaat nunarsuarmilu atuuttut pissarsiassaapput. Piginnittut namminneerlutik pisiortortarput aammalu Danmarkimi nunanilu allani suut soqutigineqarnersut malinnaaffigineqarpoq. Tamannalu peqqutaalluni tunisassiat naleqqussarneqartuaannarput pilertortumillu nioqqutissanik nutaanik saqqummersitsisoqartarsinnaalluni.
Pisartut mamarisaat sukkasuumik ineriartortarput, tamannalu Vinslottetimi ilisimaneqarpoq. Amerlasuut tunguarnittunik aalajangersimasunillu mamalinnik perusuttarput, aammalu hvidviinnit kimillit viinnillu syrillit soorlu champagnit soqutigineqaleraluttuinnarput. Imigassani whisky soqutigineqaleriartorpoq, ginilu aalajaatsumik inissisimalluni. Pisisartut inuusunnerit pitsaasunik soqutiginnileraluttuinnarput, taamaattumik vodkat ginillu akikinnerpaat pisiariinnarunnaarlugit mamarnerit pisiarineqartalerput.
Pisiniarfinni pisiassanik tuniniaanerup saniatigut Vinslottetimi viinninut imigassanullu tunngatillugu ilisimasat inuiaqatigiinnilu sinaakkutit pillugit paasissutissiisoqartarpoq. Sulisut peqatigiiffiinut suliffeqarfinnullu namminerisamik inigisami imaluunniit Café Tamu suleqatigalugu viinninik ooqattaartitsisoqartarpoq. Café Tamumi aaqqissuussat anginerusut periarfissaasarput. Aaqqissuussaq uteqqiattoq tassaavoq oktobarimi vinfestivalertitsisarneq, tassani peqataasut 200 missaanniittarpoq, tassanilu ooqattaasoqarsinnaasarpoq ataatsimoortoqartarlunilu.
Piffissami matumani Vinslottetimi namminerisamik tunisassiat ineriasarneqarput. Maanna ginimik GIN MARTIN-imik taaguusikkamik tunisassiorneq misilittarneqarpoq, taannalu kalaallit paarnaat naasuutaallu atorlugit sanaajuvoq. Mikisunik poortorneqarsimapput, taakkualu illoqarfimmi tunisassiarineqarput takornarissallu immikkuullarissunik angerlaasserusuttut aamma pisiarisinnaavaat.
Naak Vinslottetimi digitaliseeriineq e-handeliluunniit pillugit tigussaasumik pilersaarusiortoqarsimanngikkaluartoq, inuussutissarsiorfimmi ineriartornermut malinnaasoqarpoq unammilligassallu takkukkumaartussat ingerlaavartumik iliuuseqarfigineqartarlutik. Imigassaq paquminartuuvoq piginnittullu ilorrisimaarnerup atornerluisuunerullu killingi sumiinnersut ilisimaffigaat. Taamaattumik aamma akisussaassuseqartumik imigassartortarneq siuarsarniarpaat aammalu ammasarfiit, ussassaarineq neqerooruteqartarnerlu pillugit inatsisissat ammasumik oqaloqataaffigalugit. Inuussutissarsiuteqarfiup iluani ingerlatsisutut tamanna pissusissamisoortumik suliassarisutut isigiinnarpaat.
Pitsaassusillit, nammineq soqutigisat sumiiffimmilu piumaneqartut ilisimaneqarneri aallaavigalugit suliffeqarfimmik soqutigisamik ingerlatsinermut Vinslottet assersuutissaavoq. Ukiorpassuarni naleqqussartarsimapput, atuisullu naligalugit neqeroorutaasinnaasut ineriartortittarpaat aammalu nutaamik eqqarsarsinnaanertik attatiinnassamaarpaat aallartiffitsik ataqqillugu. Taamaattumik Sulisitsisunit Vinslottet qaammammi suliffeqarfittut toqqarneqarpoq.
