31/01/2023
QAAMMAMMI SULIFFIK
Isummersorneqarneq ilikkarnarlunilu suliffeqarfimmit tusassallugu pitsaanerusoqanngilaq, ´qanoq allat iliortarnersut.´ A...
Oktober 2023
Alcoa oqaluuserineqaqqaalermat, Maniitsumi nuannassimaqaat neriuuteqarsimaqalutillu. Innuttaasut nutaaliornissamut ineriartornissamullu takorluuisimapput. Piffissamilu ajunngitsuinnarmik eqqarsaateqarfiup nalaani Maniitsoq Tour Boat pilersinneqarpoq. Illoqarfimmi akunnittarfiuteqareersup, Søren Lyberthip, suliffeqarfiit marluk ingerlannissaat periarfissatut pissusissamisoortutut isigisimavaa.
Maniitsoq Tour Boat piffissap sivikitsup ingerlanerinnaani sumiiffimmi takornarialerisunik sullissinermi qitiusumik inissisimalerpoq. Maniitsoq Kalaallit Nunaanni illoqarfinnut allanut sanilliullugu takornariaqarfissuunngikkaluarluartoq, Sørenip suleqataasalu takornarissat akimanerusut sullinnissaannut immikkut sullissisinnaapput. Takornarissat tassaanerupput heliskiingeriartartut aalisariartartullu – periarfissallu taakkua marluk sumiiffiup nalaani pilerigineqaqaat.
Suliffeqarfiulli sunniutai takornariaqarnerup iluaniiginnanngillat. Maniitsoq Tour Boat sumiiffiup nalaani attaveqaatini pingaarutilittut inissisimavoq. Sørenip nassuiaatigaa Alcoa pillugu suliniutip qatanginnarnera pakatsinaraluartoq nutaamik eqqarsartariaqalersitsisimasoq. Angallatinut aningaasaliingaatsiarsimanerup kingunerisaanik aalajangersimavoq Maniitsup Nuullu akornanni angallassinissamik neqerooruteqarniarluni, taamaalilluni innuttaasut illoqarfiit akornanni angallassinnaanerat pisariinnerulerlunilu attaveqaatit pitsaanerulersinneqarlutik.
Maniitsoq, ”Kalaallit Nunaata Venedigia"-tut taaneqartarpoq, nuanneqalunilu. Qeqertat ikaartarfilersorneqarsimapput, ikerasaallu immikkuullaritsitsillutik. Maniitsoq Tour Boat aqqutigalugu takornarissat innuttaasullu illoqarfik imaanit misisgisassarsiorfigisinnaalerpaat, tamannalu allaanerusunik puigunaatsunillu misigisaqartitsivoq.
Takornarissanik angallassinerup saniatigut Søren suliffeqarfinnik allanik ingerlataqarpoq, taakkua ilagaat akunnittarfik. Sørenip oqaatigaa akisussaffinnik agguaaneq pingaaruteqartorujussuusoq, suliffeqarfimminilu ingerlatat ataatsimut isigisinnaanissaat pingaarteqarnerarlugu.
Maniitsoq Tour Boatip ingerlalluarneranut qitiusoq tasaavoq suleqatigiinneq. Sumiiffimmi suliffeqarfiit suleqatiginerisa saniatigut Søreni aamma Sulisitsisunut qanimut attaveqarpoq. Suleqatigiinneq tamanna ilisimasanik siunnersortinnermillu periarfissiivoq, taakkualu aamma suliffeqarfiutaata pitsanngornissaanut aamma iluaqutaasimallutik.
Siunissaq eqqarsaatigalugu Maniitsoq Tour Boat takorluugarpassuaqarpoq. Sørenip Maniitsumi innuttaasut takornarissallu soqutigisani nutaaliorninilu aallaavigalugit sullinnissai kissaatigaa. Nuummi mittarfittaartoqarnissaanut atatillugu piareersaatitut Targami pingajussaannik piseqqammerpoq, taannalu atorlugu illoqarfiit akornanni angallannerit amerlisarniarlugit.
Maniitsoq Tour Boat qaammatip suliffeqarfinngorneranut pilluaqqungaarparput. Maniitsoq Tour Boatip ukiuni tulliuttuni ineriartornissaata iluatsitsinissaatalu malinnaaviginissaa qilanaareqaarput.
