Qaammatip suliffeqarfia: Rambøll Grønland A/S

Rambøll Grønland A/S ukiuni 40-ngajanni Kalaallit Nunaanni teknikkitigut assigiinngitsutigut siunnersuisarsimavoq. Nuummi qitiusumik allaffeqarput, taassumalu saniatigut Ilulissani Sisimiunilu allaffeqarput, kiisalu Qaqortumi suliniuteqarnermut atatillugu allaffeqarlutik. Taamaalilluni suliffeqarfik Kalaallit Nunaata sineriaat tamakkerlugu sullissiffigaa. Rambøll Grønlandimi sulisut 25-pajaajupput, assigiinngitsunillu iliniarsimallutik. Ilaat Ingeniøriupput, ilaat illussanik titartaasartut, soorluttaaq aamma tekniske designereqarlunilu konstruktøreqartoq.

Suliffeqarfiup anguniagaa tassaavoq Kalaallit Nunaanni sanaartornerup iluani sullitaminnut qanimut suleqatiginninnissaq. Rambøll Grønlandimi illussanik sanaartugassanilluunniit suliniuteqarnissamut, tunisassiornissamut, ingerlatsinissamut, aserfallatsaaliinissamut, nutarsaanissamut siunnersuisarput. Sanaartortitsinerup iluani siunnersuinerup saniatigut Rambøll Grønland avatangiisinut, nukissiuuteqarnermut aqutsinermullu tunngasut iluini piginnaasaqarput, taamaattumik suliniutinut assigiinngitsunut suleqatigissallugit pitsassuullutik.

Rambøll Grønlandili ukiut ingerlanerini ineriartorusaarsimavoq, niuernermilu pisariaqartinneqartunut teknikkitigullu ineriartornermut nalimmassartarsimallutik. Suliniutigineqartut Kalaallit Nunaat sineriaanni sumiiffinni assigiinngitsuni ingerlanneqartarsimapput, ilaatigut aqqusinniornerit, sanaartornissamut piareersarnerit, talittarfiliornerit, illussanik nutaanik sanaartortitsinerit nutarsaanerit inissialiornerillu suleqataaffigineqarsimallutik. Illunik pioreersunik nutarterinerit allanngortitsinerillu Rambøll Grønlandimi piujuartitsinermik tunngaveqarluni ingerlanneqartarsimapput.

Rambøll Grønlandimi maannamut pisortaanertut inissisimasoq, Inooraq Brandt, atorfimmini ukiut marluk affarlu inissisimasimavoq, suliffeqarfimmullu piginnaanernik immikkuullarissunik alapernaassusermillu tunniussisimalluni. Danmarkimi ingeniørinngorniarsimavoq, ilinniarnerminiillu Rambøll Danmarkimi Kalaallit Nunaannilu misilittagaqarpoq, taamaalilluni suliffeqarfiup periusaa suliarisinnaasaalu ilisimalluarpai.

Inooraq Brandtip pisortaanertut inissisimanermini Rambøll Grønland ineriartortissimavaa, sulisullu akornanni ilisimasanik piginnaasanillu avitseqatigiissinnaaneq siuarsarsimallugu. Tamannalu atuisunut pitsaanerpaanik aaqqiissutinik ujartuiniarnermi pingaaruteqarluinnarpoq Kalaallit Nunaannilu inuiaqatigiinnut ajunngitsumik aamma sunniuteqarluni.

Rambøll Grønlandimi piujuartitsineq anguniarneqartuni qitiusutut inissisimavoq. Suliffeqarfiup inuiaqatigiinni inuit pinngortitarlu pitsaasumik ineriartortinnissaat anguniarneqarpoq. Tamannalu anguniarlugu Kalaallit Nunaanni piginnaasat ineriartortinniarneqarput tamannalu aamma Rambøll Grønlandimi sulisut immikkut ilisimasassaannut iluaqutaavoq. Attaveqaasersuinermi sanaartornermilu piujuartitsinermik tunngaveqartunik aaqqiissuteqarnikkut Rambøll Grønlandip nunatsinni pitsaasumik ineriartortoqarnissaa anguniarneqarpoq. Nukissiuuteqarnerup iluani immikkut ukkataqartoqarpoq, tassami suliffeqarfimmit teknologi Power to X (P2X) atorlugu periarfissat suunersut misissorneqarput. Nukissioriaatsimi Power to X-imi (P2X) nukissaq atorneqanngitsoortoq allanut nukissiuutinngortinneqarsinnaavoq soorlu brinti syntetiskinulluunniit alla. Taamaaliornikkut nukissat toqqorterneqarsinnaapput silaannarmillu CO2-mik aniatitsineq annikillisarneqarsinnaalluni.

Kalaallit Nunaanni sulineq allanngorarsinnaavoq, ilaatigullu sumiiffiit unamminarsinnaasarlutik, taamaattumik aaqqiissutaasinnaasunik nutaaliaasunik pisariaqartitsisoqartarpoq nalimmassarsinnaassuseqartariaqarlunilu. Rambøll Grønlandimiillu teknologi immikkuullarissut, soorlu digitalimik 3D scannerineq, dronet atorlugit assiliineq sanaartorfissanillu misissuineq atorneqartarput, taamaaliortarpullu suliniutini pitsaanerpaamik tunngaveqarnissaq qulakkeerniarlugu, avinngarusimasuni allaat. Teknologit atorlugit misissuineq aalajangiisinnaassuserlu pitsaanerulertarput, taakkualu suliniutit ingerlalluarnissaannut pingaaruteqarluinnarput

Rambøll Grønlandimi siunissaq ungasinnerusoq isigalugu Kalaallit Nunaanni inuiaqatigiinni piujuartitsinermik tunngaveqarluni ineriartortitsinissaq takorluugaavoq. Piujuartitsinermut uppernarsaasersornissaq nunallu tamalaat Kalaallit Nunaata ineriartorneranut soqutiginninnerat tunngavigalugu Rambøll Grønlandimi ineriartornissaq kiffartuussissutillu amerliartortinneqarnissaat soqutigineqarpoq. Piujuartitsinermut uppernarsaasersueriaaseq Kalaallit Nunaannut tulluarsagaq suliffeqarfimmit sulissutigineqarpoq, suliniutinilu piujuartitsinermi aaqqiissutit allaanerusut misissorneqarsinnaanissaat ilanngunniarlugu.

Mittarfissat atulernissaat, avataaniillu soqutiginninnerup annertusinerata kingunerisaanit Rambøll Grønlandimit ilimagineqarpoq ineriartortoqassasoq, tamannalu Kalaallit Nunaanni attaveqaasersuinermi piujuartitsinermillu tunngaveqartumik ineriartortitsinermut sunniuteqassaaq. Rambøll Grønlandimiillu unammilligassat takkukkumaartussat piginnaasatigut pisinnaasatigullu piareersimaffigineqarpoq, Kalaallit Nunaannilu siunissami piujuartitsinermik tunngaveqarluni ingerlatsinissaq anguniarneqassalluni.